Ջերմոցում օդափոխությունը միայն ջերմաստիճանն ու խոնավությունը կարգավորելու միջոց չէ։ Օդի շարժի արագությունը կարող է ուղղակիորեն ազդել նաև վնասատուների դեմ օգտագործվող օգտակար միջատների աշխատանքի և, հետևաբար, կենսաբանական պայքարի արդյունավետության վրա։

Հոկտեմբերի 6-ին հրապարակված մասնագիտական նյութում նշվում է, որ բույսերի սաղարթի մակարդակում օդի շարժի նպատակահարմար արագությունը սովորաբար 0.2–0.4 մ/վ միջակայքում է։

Շատ թույլ օդի շարժը նույնպես խնդիր է

Երբ օդի արագությունը նվազում է մոտ 0.15 մ/վ-ից, բույսերի շուրջ կարող են ձևավորվել գրեթե անշարժ օդային շերտեր։ Դրանցում բարձրանում է հարաբերական խոնավությունը, վատանում է գոլորշիացումը և մեծանում սնկային հիվանդությունների զարգացման համար նպաստավոր պայմանների հավանականությունը։

Սա հատկապես կարևոր է խիտ տնկարկներով լոլիկի, վարունգի և պղպեղի ջերմոցներում, որտեղ բույսերի վերին հատվածում օդի շարժը կարող է բավարար թվալ, իսկ սաղարթի ներսում՝ գրեթե բացակայել։

Շատ ուժեղ օդը կարող է խանգարել օգտակար միջատներին

Հակառակ ծայրահեղությունը նույնպես ցանկալի չէ։ Մասնագիտական հրապարակման համաձայն՝ մոտ 0.5 մ/վ-ից բարձր օդի արագության դեպքում որոշ օգտակար մակաբույծ միջատների համար դժվարանում է թռիչքը և վնասատուին գտնելու գործընթացը։

Այսինքն՝ ջերմոցի օդափոխության համակարգը կարող է տեխնիկապես լավ աշխատել, բայց չափազանց ուժեղ օդային հոսքը միաժամանակ նվազեցնել կենսաբանական պաշտպանության արդյունավետությունը։

Հատկապես կարևոր է օգտակար թռչող միջատների բացթողումից հետո առաջին ժամերը։ Մասնագետները խորհուրդ են տալիս դրանց բացթողումից հետո մոտ 2–4 ժամով նվազեցնել հորիզոնական օդափոխիչների՝ HAF համակարգերի աշխատանքը, որպեսզի միջատները հասցնեն տարածվել և տեղավորվել մշակաբույսերի վրա։

Չափել պետք է բույսերի մակարդակում

Ֆերմերի համար այստեղ ամենակարևոր եզրակացությունը պարզ է․ օդի արագությունը պետք է գնահատել ոչ միայն օդափոխիչի կամ ջերմոցի վերևի հատվածում, այլ հենց բույսերի սաղարթի մակարդակում։

Ջերմոցի տարբեր հատվածներում պայմանները կարող են զգալիորեն տարբերվել։ Մի տեղ օդը կարող է կանգնած լինել, իսկ մեկ այլ հատվածում նույն օդափոխիչը ստեղծել չափազանց ուժեղ հոսք։

Ուստի ժամանակակից ջերմոցում օդափոխության ճիշտ կառավարումը պետք է դիտարկել որպես մեկ ամբողջություն՝ ջերմաստիճան + խոնավություն + օդի շարժ + կենսաբանական պաշտպանություն։

Եթե ջերմոցում վնասատուների դեմ օգտագործվում են օգտակար միջատներ, նույնիսկ օդափոխիչների աշխատանքի ռեժիմի փոքր փոփոխությունը կարող է նշանակություն ունենալ դրանց արդյունավետության համար։

Agropress.am