Եվրամիությունը պատրաստվում է վերանայել օրգանական գյուղատնտեսության մի շարք կանոններ՝ նպատակ ունենալով պարզեցնել արտադրության և հավաստագրման գործընթացները, նվազեցնել վարչարարական բեռը և ավելի հստակեցնել օրգանական արտադրանքի միջազգային առևտրի պայմանները։
Հոկտեմբերի 20-ին Եվրոպական խորհրդի և Եվրախորհրդարանի ներկայացուցիչները նախնական քաղաքական համաձայնության են եկել համապատասխան կանոնակարգում փոփոխություններ կատարելու շուրջ։ Փոփոխությունները վերաբերում են օրգանական արտադրության, պիտակավորման, վերահսկողության և երրորդ երկրներից ներմուծման կարգավորումներին։
Առաջարկվող փոփոխությունների շրջանակում նախատեսվում է հստակեցնել բուսաբուծության և անասնապահության որոշ պահանջներ, այդ թվում՝ թռչնաբուծության, կերերի օգտագործման, օրգանական արտադրության անցումային շրջանի և անասնաբուժական բուժումների հետ կապված դրույթները։ Առանձին ուշադրություն է դարձվելու նաև ջերմոցային տնտեսություններում հողի բերրիության պահպանման պահանջներին։
Փոփոխությունների նպատակներից մեկն էլ փոքր արտադրողների և տնտեսությունների համար վարչարարական բարդությունների նվազեցումն է։ Միաժամանակ նախատեսվում է պահպանել օրգանական արտադրանքի նկատմամբ սպառողների վստահությունը և հավաստագրման համակարգի ամբողջականությունը։
Նոր կարգավորումները կարող են կարևոր նշանակություն ունենալ նաև ԵՄ շուկա արտահանող երկրների, այդ թվում՝ Հայաստանի արտադրողների համար։ Մասնավորապես, հստակեցումները կարող են ազդել օրգանական արտադրանքի հավաստագրման, ներմուծման և առևտրի պայմանների վրա։ Սակայն Հայաստանի արտահանողների համար կոնկրետ հետևանքները պարզ կլինեն միայն վերջնական կարգավորման ընդունումից և դրա կիրառման պայմանների հրապարակումից հետո։
Նախնական համաձայնությունը դեռ պետք է պաշտոնապես հաստատվի։ Կանոնակարգն ուժի մեջ կմտնի Եվրամիության պաշտոնական տեղեկագրում հրապարակվելու հաջորդ օրը։
Աղբյուր՝ Եվրոպական միության խորհուրդ։