Գեղարքունիքի մարզի գյուղատնտեսական տնտեսություններում շարունակվում է հացահատիկի և անասնակերի բերքահավաքը։
Օգոստոսի երկրորդ կեսին մարզի մի շարք համայնքներում դաշտային աշխատանքները ակտիվ փուլում են, իսկ գյուղացիական տնտեսությունները փորձում են հնարավորինս արագ ավարտել բերքի հավաքն ու ապահովել անասնակերի անհրաժեշտ պաշարը։ Մարզպետի աշխատակազմի գյուղատնտեսության և շրջակա միջավայրի պահպանության վարչության տվյալներով՝ այս պահին տնտեսություններում արդեն կուտակվել է 78 հազար 510 տոննա խոտ և 2652 տոննա ծղոտ։
Հացահատիկային մշակաբույսերի մասով ևս աշխատանքները շարունակվում են։ Արդեն հնձվել է 1702 հեկտար աշնանացան ցորենի, 544,4 հեկտար գարնանացան ցորենի և 2372 հեկտար գարու արտ։ Հավաքված բերքի ծավալը կազմում է 4270 տոննա աշնանացան ցորեն, 1150,8 տոննա գարնանացան ցորեն և 4995 տոննա գարի։ Միջին բերքատվությունը, ըստ մարզային տվյալների, ներկայում կազմում է 20-25 ցենտներ մեկ հեկտարից։
Գեղարքունիքի համար բերքահավաքի այս փուլը կարևոր է ոչ միայն հացահատիկի արտադրության, այլև անասնապահության համար։ Հավաքվող խոտի և ծղոտի պաշարները պետք է ապահովեն տնտեսությունների անասնակերի պահանջարկը հատկապես ձմռան ամիսներին։ Այս տարվա անասնակերի բերքահավաքի մեկնարկին մարզային իշխանությունները նշել էին, որ առատ տեղումների և եղանակային բարենպաստ պայմանների արդյունքում խոտհարքերում և արոտավայրերում բուսականությունը լավ է զարգացել, ինչը տնտեսություններին հնարավորություն է տալիս ավելի մեծ պաշարներ կուտակել։ Գեղարքունիքում հացահատիկի և անասնակերի բերքահավաքը նախատեսվում է շարունակել մինչև սեպտեմբերի առաջին տասնօրյակը։
Առաջիկա շաբաթներին աշխատանքների ծավալը կախված կլինի ինչպես եղանակային պայմաններից, այնպես էլ տեխնիկայի հասանելիությունից և դաշտերում բերքի հասունացման ընթացքից։ Գյուղատնտեսական տարվա վերջնական արդյունքները, մասնավորապես՝ հացահատիկի ընդհանուր արտադրության և մեկ հեկտարի միջին բերքատվության ցուցանիշները, առավել հստակ կգնահատվեն բերքահավաքի ամբողջական ավարտից հետո։
Agropress.am