Հայաստանից Իրան կարող են արտահանվել մանր եղջերավոր կենդանիներ․ երկու երկրների ներկայացուցիչները քննարկել են ոչխարների և այծերի մատակարարման, արոտավայրերի օգտագործման և անասնաբուծության ոլորտում համագործակցության ընդլայնման հնարավորությունները։
Հայաստանի և Իրանի միջև գյուղատնտեսական համագործակցության ընդլայնման նոր հնարավորություններ են քննարկվել Ալմաթիում՝ Եվրասիական տնտեսական միության ագրոարդյունաբերական քաղաքականության խորհրդի նիստի շրջանակում։
ՀՀ էկոնոմիկայի նախարար Գևորգ Պապոյանը հանդիպել է Իրանի գյուղատնտեսության նախարարի տեղակալ Աքբար Ֆաթհիի հետ։ Քննարկումների ընթացքում առանձնահատուկ ուշադրություն է դարձվել անասնաբուծության ոլորտին։ Իրանական կողմը հետաքրքրված է Հայաստանից մանր եղջերավոր կենդանիների՝ մասնավորապես ոչխարների և այծերի ներմուծմամբ։
Իրանական կողմի գնահատմամբ՝ Հայաստանի արոտավայրերի ներուժը կարող է հիմք դառնալ անասնաբուծության ոլորտում համագործակցության ընդլայնման համար։ Քննարկվել է նաև անհրաժեշտ կենդանիների մատակարարման և առևտրի համար համապատասխան մեխանիզմների ստեղծման հարցը։
Միաժամանակ ընդգծվել է, որ կենդանիների փոխանակումը պետք է իրականացվի անասնաբուժական և սանիտարական պահանջների պահպանմամբ։ Սա նշանակում է, որ հնարավոր արտահանման դեպքում կարևոր նշանակություն կունենան կենդանիների առողջական վիճակի վերահսկումը, համապատասխան փաստաթղթավորումը և սահմանային անասնաբուժական ընթացակարգերը։
Համագործակցությունը միայն կենդանիների արտահանմամբ չի սահմանափակվում
Հայաստանի և Իրանի քննարկումների օրակարգում ընդգրկվել են նաև գյուղատնտեսական արտադրանքի վերամշակումը, ջերմոցային տնտեսությունները, սառնարանային և պահեստային ենթակառուցվածքները։
Հայկական կողմը առաջարկել է գյուղատնտեսության տարբեր ուղղություններով համատեղ ներդրումային ծրագրեր իրականացնել։ Քննարկվել են նաև ոռոգման արդյունավետության, ջրախնայող տեխնոլոգիաների, գյուղատնտեսության թվայնացման և արտադրողականության բարձրացման ուղղությամբ փորձի փոխանակման հնարավորությունները։
Իրանի գյուղատնտեսության նախարարության ներկայացուցիչն իր հերթին նշել է, որ Թեհրանը պատրաստ է զարգացնել համագործակցությունը ԵԱՏՄ անդամ երկրների հետ՝ ընդլայնելով առևտուրը, ներդրումները, տեխնոլոգիաների փոխանցումը և գյուղատնտեսական արժեքային շղթաները։
Ի՞նչ կարող է սա տալ հայ անասնապահին
Եթե քննարկվող ծրագրերը վերածվեն գործնական պայմանավորվածությունների, Հայաստանի անասնապահների համար կարող է ձևավորվել նոր արտահանման ուղղություն։
Հատկապես հետաքրքրություն կարող է ներկայացնել ոչխարաբուծությամբ և այծաբուծությամբ զբաղվող տնտեսությունների համար։ Իրանի շուկա կենդանիների արտահանման հնարավորության դեպքում կավելանա իրացման շուկաների բազմազանությունը, ինչը կարող է նպաստել արտադրության ընդլայնմանը։
Սակայն դրա համար անհրաժեշտ կլինի ապահովել կենդանիների առողջական բարձր ցուցանիշներ, ցեղային և արտադրական որակի համապատասխանություն, ինչպես նաև արտահանման պահանջներին համապատասխան փաստաթղթավորում և անասնաբուժական վերահսկողություն։
Հայաստանի համար սա կարող է դառնալ ոչ միայն գյուղմթերքի արտահանման, այլև անասնաբուծության զարգացման նոր հնարավորություն․ եթե Իրանի պահանջարկը վերածվի կայուն շուկայի, հայկական ֆերմերների համար կստեղծվի լրացուցիչ իրացման ուղղություն։